ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବୁଧବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ତୀବ୍ର ଆକ୍ରମଣ କରି ଅଭିଯୋଗ କରିଛନ୍ତି ଯେ ସେ ଦେଶର କାର୍ଯ୍ୟକାରୀ ପ୍ରଧାନମନ୍ତ୍ରୀ ଭଳି କାର୍ଯ୍ୟ କରୁଛନ୍ତି। ଉତ୍ତର ବଙ୍ଗର ବନ୍ୟା ଓ ଭୂସ୍ଖଳନ ପ୍ରଭାବିତ ଅଞ୍ଚଳ ପରିଦର୍ଶନରୁ ଫେରିବା ପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପରାମର୍ଶ ଦେଇ କହିଛନ୍ତି, “ଅମିତ ଶାହଙ୍କ ଉପରେ ଅଧିକ ଭରସା କରନ୍ତୁ ନାହିଁ, ସେ ଦିନେ ଆପଣଙ୍କ ମୀରଜାଫର ହୋଇପାରନ୍ତି।” ମମତା ୧୮ମ ଶତାବ୍ଦୀର ବଙ୍ଗ ସେନାପତି ମୀରଜାଫରଙ୍କୁ ଉଲ୍ଲେଖ କରିଛନ୍ତି, ଯିଏ ପଲାସି ଯୁଦ୍ଧରେ ନବାବ ସିରାଜୁଦ୍ଦୌଲାଙ୍କୁ ବିଶ୍ୱାସଘାତକତା କରି ଇଂରେଜମାନଙ୍କ ସହ ମିଳିତ ହୋଇ ବଙ୍ଗର ଶାସକ ହୋଇଥିଲେ।
ତୃଣମୂଳ କଂଗ୍ରେସ ସଭାପତି ମମତା ବାନାର୍ଜୀ ଭାରତୀୟ ଜନତା ପାର୍ଟି (ଭାଜପା) ଉପରେ ନିର୍ବାଚନ ଆୟୋଗଙ୍କ କାର୍ଯ୍ୟରେ ହସ୍ତକ୍ଷେପ କରି ନିର୍ବାଚନୀ ରାଜ୍ୟଗୁଡ଼ିକରେ ମତଦାତା ତାଲିକାର ସ୍ୱତନ୍ତ୍ର ଗଭୀର ପୁନରୀକ୍ଷଣ (ଏସଆଇଆର) ପ୍ରକ୍ରିୟାକୁ ପ୍ରଭାବିତ କରିବାର ଅଭିଯୋଗ ଲଗାଇଛନ୍ତି। ସେ କହିଛନ୍ତି, “ଭାଜପାର ଜଣେ ନେତା ବୈଠକ କରି ବଙ୍ଗର ମତଦାତା ତାଲିକାରୁ ଲକ୍ଷ ଲକ୍ଷ ନାମ ହଟାଇବେ ବୋଲି କହୁଛନ୍ତି। ବର୍ତ୍ତମାନ ବନ୍ୟା, ଭାରୀ ବର୍ଷା ଓ ପର୍ବ ସମୟରେ ୧୫ ଦିନ ମଧ୍ୟରେ ଏସଆଇଆର ପ୍ରକ୍ରିୟା ଓ ନୂଆ ନାମ ଯୋଗ କରାଯାଇପାରିବ କି?”
ସେ ପ୍ରଶ୍ନ ଉଠାଇଛନ୍ତି ଯେ ନିର୍ବାଚନ ଆୟୋଗ ଭାଜପାର ଇଶାରାରେ କାମ କରିବା ଉଚିତ ନା ଲୋକଙ୍କର ଗଣତାନ୍ତ୍ରିକ ଓ ନାଗରିକ ଅଧିକାର ସୁରକ୍ଷା ପାଇଁ କାର୍ଯ୍ୟ କରିବା ଉଚିତ? ମମତା ଅଭିଯୋଗ କରିଛନ୍ତି, “ଏହା ସବୁ ଅମିତ ଶାହଙ୍କ ଦ୍ୱାରା ଖେଳାଯାଉଥିବା ଖେଳ। ସେ କାର୍ଯ୍ୟକାରୀ ପ୍ରଧାନମନ୍ତ୍ରୀ ଭଳି ବ୍ୟବହାର କରୁଛନ୍ତି, କିନ୍ତୁ ମୋଦି ସବୁ ଜାଣିଛନ୍ତି।”
ସେ ଭାଜପାକୁ ଦେଶକୁ ନଷ୍ଟ କରିବାର ଅଭିଯୋଗ କରି ଚେତାବନୀ ଦେଇଛନ୍ତି ଯେ ସେମାନେ ସଧାବେଳେ କ୍ଷମତାରେ ରହିବେ ନାହିଁ। ମମତା କହିଛନ୍ତି, “ମୁଁ ଅନେକ ସରକାର ଦେଖିଛି, କିନ୍ତୁ ଏପରି ଅହଙ୍କାରୀ ଓ ସ୍ୱୈରଶାସିତ ଶାସନ କେବେ ଦେଖିନାହିଁ।”
