ଗୁଗୁଲ୍ ସିଇଓ ସୁନ୍ଦର ପିଚାଇଙ୍କ ବଡ଼ ଘୋଷଣା। ଭାରତରେ ନିର୍ମାଣ ହେବ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା ଏଆଇ ହବ୍ । ଯାହାକୁ ନେଇ ୧୫ ବିଲିୟନ ଡଲାର ନିବେଶ କରିବ କମ୍ପାନୀ ବୋଲି ସୁନ୍ଦର ପିଚାଇ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ସେ ଏହି ବିଷୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ କଥା ହୋଇଛନ୍ତି। ଆନ୍ଧ୍ରପ୍ରଦେଶର ବିଶାଖାପାଟନମ୍ରେ ଏକ ନିର୍ଦ୍ଦିଷ୍ଟ ଯୋଜନା ସହିତ ଏକ ବଡ଼ ଡାଟା ସେଣ୍ଟର ଏବଂ ଏଆଇ ହବ୍ ନିର୍ମାଣ କରାଯିବ ।
ସୁନ୍ଦର ପିଚାଇ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏହି ବିଷୟରେ ଏକ ପୋଷ୍ଟ ମଧ୍ୟ ସେୟାର କରିଛନ୍ତି। ସେ ଲେଖିଛନ୍ତି, “ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ କଥା ହେବା ଏକ ସୁନ୍ଦର ଅଭିଜ୍ଞତା ଥିଲା। ଆମେ ବିଶାଖାପାଟଣାରେ ନିର୍ମିତ ହେବାକୁ ଥିବା ଗୁଗୁଲର ପ୍ରଥମ AI ହବ୍ ପାଇଁ ଯୋଜନା ସେୟାର କରିଥିଲୁ। ଏହା ଏକ ଐତିହାସିକ ପଦକ୍ଷେପ ହେବ। ଏହି ହବରେ ଗିଗାୱାଟ୍-ସ୍କେଲ କମ୍ପ୍ୟୁଟିଂ କ୍ଷମତା, ଏକ ନୂତନ ଅନ୍ତର୍ଜାତୀୟ ଉପ-ସମୁଦ୍ର ପ୍ରବେଶପଥ ଏବଂ ବୃହତ ଶକ୍ତି ଭିତ୍ତିଭୂମି ଅନ୍ତର୍ଭୁକ୍ତ ହେବ।” ଗୁଗୁଲ୍ ଭାରତରେ ୧୫ ବିଲିୟନ ଡ଼ଲାରନିବେଶ କରିବାକୁ ଯୋଜନା କରୁଛି । ଏହା ଦେଶ ପାଇଁ ଏକ ଜ୍ୟାକପଟ ଠାରୁ କମ୍ ନୁହେଁ । ଏଥିରୁ ଭାରତ ଯଥେଷ୍ଟ ଲାଭ ପାଇବ । ଏହି ୧୫ ବିଲିୟନ ଡ଼ଲାର ଭାରତୀୟ ମୁଦ୍ରାରେ ୧,୩୩୧,୮୫ ବିଲିୟନ ସହିତ ସମାନ ।
ପିଟିଆଇ ରିପୋର୍ଟ ଅନୁସାରେ, ଗୁଗୁଲର ଏକ କାର୍ଯ୍ୟକ୍ରମରେ ଯୋଗଦେଇ ଗୁଗୁଲ କ୍ଲାଉଡ୍ ସିଇଓ ଥମାସ୍ କୁରିଆନ୍ କହିଛନ୍ତି ଯେ, ନୂତନ ଏଆଇ ହବ୍ ଏଆଇ ଭିତ୍ତିଭୂମି, ନୂତନ ଡାଟା ସେଣ୍ଟର କ୍ଷମତା, ବୃହତ ଶକ୍ତି ଉତ୍ସ ଏବଂ ଏକ ବିସ୍ତାରିତ ଅପ୍ଟିକାଲ୍ ଫାଇବର ନେଟୱାର୍କକୁ ଏକକୀକୃତ କରିବ। କୁରିଆନ୍ ଆହୁରି କହିଛନ୍ତି ଯେ, “ଆମେ ବିଶାଖାପାଟଣାରେ ଏକ ଏଆଇ ହବ୍ ପ୍ରତିଷ୍ଠା କରିବା ପାଇଁ ଆଗାମୀ ପାଞ୍ଚ ବର୍ଷ ମଧ୍ୟରେ ୧୫ ବିଲିୟନ ଆମେରିକୀୟ ଡଲାର ନିବେଶ କରିବାକୁ ଯୋଜନା କରୁଛୁ। “ଏହା ଗୁଗୁଲର ପ୍ରଥମ ଏଆଇ ହବ୍ ହେବ। ଏହା ଭାରତୀୟ ଏଆଇ ଇଞ୍ଜିନିୟରମାନଙ୍କ ପାଇଁ ମଧ୍ୟ ସୁଯୋଗ ପ୍ରଦାନ କରିବ। ଥମାସ କୁରିଆନ ଏହି କାର୍ଯ୍ୟକ୍ରମରେ କହିଥିଲେ ଯେ ଗୁଗୁଲ ଗତ ୨୧ ବର୍ଷ ଧରି ଭାରତରେ କାର୍ଯ୍ୟ କରୁଛି ଏବଂ ୧୪ ହଜାରରୁ ଅଧିକ ଭାରତୀୟ ଏହା ସହିତ ଜଡିତ।
