ବଲାଙ୍ଗୀର,୧୬।୧: ଚର୍ଚ୍ଚିତ ଯାତ୍ରା ଡ୍ୟାନ୍ସର ନିଶା ମହାରାଣାଙ୍କୁ ନେଇ ବଲାଙ୍ଗୀର ଜିଲାରେ ଏକ ନୂଆ ବିବାଦ ମୁଣ୍ଡ ଟେକିଛି। ଅଭିଯୋଗ ହୋଇଛି ଯେ, ଯେଉଁ ଯାତ୍ରା ମଞ୍ଚରେ ନିଶା ଅଶ୍ଳୀଳ ନୃତ୍ୟ ପରିବେଷଣ କରିଥିଲେ, ତାହାକୁ ଜଣେ ପୋଲିସ ଅଧିକାରୀ ହିଁ ଉଦ୍ଘାଟନ କରିଥିଲେ। ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଗତ ଜାନୁଆରୀ ୧୨ ତାରିଖରେ ବଲାଙ୍ଗୀର ସଦର ଥାନା ଅନ୍ତର୍ଗତ ଚନ୍ଦନଭାଟି ଅଞ୍ଚଳରେ ଏକ ଯାତ୍ରା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଅଭିଯୋଗ ଅନୁଯାୟୀ, ଚନ୍ଦନଭାଟି ଫାଣ୍ଡି ଅଧିକାରୀ ରଞ୍ଜିତ ପ୍ରଧାନ ଏହି ଶୋ’କୁ ଉଦ୍ଘାଟନ କରିଥିଲେ। କେବଳ ସେତିକି ନୁହେଁ, ମଞ୍ଚରେ ଅଶ୍ଳୀଳ ନୃତ୍ୟ ଚାଲିଥିବା ସମୟରେ ପୋଲିସ ବାବୁ ଜଣକ ଦର୍ଶକଙ୍କ ଗହଣରେ ବସି ନାଚ ଦେଖୁଥିଲେ ମଧ୍ୟ କୌଣସି ଆପତ୍ତି କରିନଥିବା ପ୍ରତ୍ୟକ୍ଷଦର୍ଶୀମାନେ କହିଛନ୍ତି।
ଏହି ଘଟଣା ପରେ ପୋଲିସ ପକ୍ଷରୁ ଯାତ୍ରା କାର୍ଯ୍ୟକ୍ରମର ଦୁଇ ଜଣ ଆୟୋଜକଙ୍କୁ ଗିରଫ କରାଯାଇଛି। ସେମାନଙ୍କୁ କୋର୍ଟରେ ହାଜର କରାଯିବା ପରେ ଜାମିନ ମିଳିଥିବା ସୂଚନା ମିଳିଛି।
ଅଶ୍ଳୀଳ ନୃତ୍ୟ ପରିବେଷଣ ଅଭିଯୋଗରେ ବଲାଙ୍ଗୀର ସଦର ଥାନାରେ ନିଶା ମହାରାଣାଙ୍କ ବିରୋଧରେ ମାମଲା ରୁଜୁ ହୋଇଛି। ନିଶାଙ୍କୁ ଗିରଫ କରିବା ପାଇଁ ବଲାଙ୍ଗୀର ପୋଲିସର ଏକ ଟିମ୍ ଭୁବନେଶ୍ୱରରେ ଡେରା ପକାଇଛି।
ସାଧାରଣରେ ଶାଳୀନତା ରକ୍ଷା କରିବା ପାଇଁ ପୋଲିସର ଦାୟିତ୍ୱ ଥିବାବେଳେ, ଜଣେ ଅଧିକାରୀଙ୍କ ଉପସ୍ଥିତିରେ ଏଭଳି ଅଭଦ୍ରାମି କିପରି ଚାଲିଥିଲା, ସେ ନେଇ ସାଧାରଣ ଲୋକେ ପ୍ରଶ୍ନ ଉଠାଇଛନ୍ତି। ଯାତ୍ରାର ପାରମ୍ପରିକ ଗାରିମା ନଷ୍ଟ କରୁଥିବା ଏଭଳି ନୃତ୍ୟକୁ ସମ୍ପୂର୍ଣ୍ଣ ନିଷେଧ କରିବାକୁ ଯାତ୍ରାପ୍ରେମୀମାନେ ଦାବି କରିଛନ୍ତି।
